i understand

على الكنبة كان " i understand " , بينما كنت أفكر بصوت عال: ريم شكلها حتطلع ديني.., فأجاب على الفور : جرّب تشتريلها هدية صغيرة ..مع كارت فيه إعتذار..إزّاي مفكرتش تعمل كده ؟ , توقفت يدي بماكينة الحلاقة أمام وجهي و التفت جهة الصالة..كان " i understand " يضيئ بشكل متتابع , تابع بعد لحظة بنفس صوته الرزين و المرح : رأيي كمان إنك تعدّي النهاردة على سيلانترو..باين من صوتك إنك مشدود..

***

الآن..

i understand , أحدث منتج إجتماعي رقمي , يمكنه بعد فترة مذهلة أن يصبح صديقك الشخصي و الحميم , فقط تحكي له قليلا عن الموضوعات التي ترغب في الحديث بشأنها , بعدها , فقط اذكر أي شئ يتعلق بالموضوع بينما i understand بالجوار..ثم استمتع ..!

***

وضعت i understand بجواري على مقعد السيارة , لم أكن أعتقد أنه سيبدأ العمل معي بهذه السرعة , اشتريته بالأمس بناء على نصيحة " ربيع " , ألحّ علي كثيرا لتجربته , فانطلقت في طريق العودة إلى البيت أحكي لجهاز أزرق داكن يشبه الموبايل عن كل تفاصيل حياتي الشخصية كما أوصاني "ربيع " أن أفعل في أقرب وقت , لذا أعتقد أن ما حدث هذا الصباح أثناء حلاقتي لذقني و ما استمر بعدها يثبت أنني فعلا كنت أحتاجه و أنني سأحب هذا الجهاز كثيرا..

في الشركة , قابلت "ربيع " ..

_ المشكلة بس إني حاسس إني بتكلم مع كلارك جيبل

قلت مبتسما

انطلق "ربيع" وهو يتناول مني الجهاز :

يابني طول عمرك عدو التكنولوجيا..فيه زراير هنا تختار منها تون الصوت و لهجته و نبرته ..تحب تدردش مع منى زكي ؟

_ طيب لو الجهاز ده وقع في إيد واحد زي حضرتك مثلا ؟

= ولا حعرف أي حاجة..الجهاز ممكن يشتمني و يفضحني بإنذار بن كلب شنيع لو حاولت أعرف منه أسرارك أو قلدت صوتك..حعلمك إزاي تظبطه ..

_ بس لذيذ

_ جدا !

يعرف " ربيع " أنني فعلا عدو لكافة المنتجات الإجتماعية الرقمية , ابتداءا من الـ face book إلى الموبايل..الأبواق الموصلّة بأسلاك إلى عينك و أذنك و ذهنك تذيع و تقترح و تعلن للمتحكمين في هذه الشبكات..أنا أعرف جيدا كخبير في الإعلان معنى أن تتعرض يوميا إلى ثلاثة أشكال من إعلان عن " عصير الأرز " , يوما ما ستشتريه و أنت مقتنع تماما أنه شئ طبيعي جدا أن تفعل ذلك بينما تتجول في السوبر ماركت..هناك ذهنيات مضادة للإعلان..و هذه تحتاج إلى جهود خاصة..وهناك ذهنيات بسيطة هي 90 % من سكان الكوكب ..أما الحقيقة الأكيدة هو أنه ليس هناك وجود للإنسان نقي التأثّر من الإعلان ..

نزلت من الشركة لأشتري هدية لريم ثم أتجول قليلا و أعود للشركة مرة أخرى..طلبت ريم مرة أخرى فلم تردّ..

_ ممكن تشتري لريم كتاب " إله الأشياء الصغيرة " لآرونداتي روي ..

= بص يا ريس..ممكن بعد إذنك ما تقترحش عليا إلا لما أطلب منك...

_ براحتك...زي ما تحب...بس المهم دلوقتي "ريم "..

= على رأيك..

_ " أسامة " إحنا دلوقتي فين ؟

= في شارع جامعة الدول في المهندسين في..

_ أنا مش سايح يا " أسامة "..! أنا عارف الشارع كويس..

= هههههههههههههههههههههههههههههههههههههههههههه...إنت مين اللي مطوّرك يابني..

_ أعتقد إننا دلوقتي لازم نفكّر في "ريم "...ححكيلك بالتفصيل في وقت تكون مستعد لسماع قصة حياتي المملة. .اطلع على سيلانترو جامعة الدول بقى عشان شكلك محتاج تسترخي و أنا كمان عايز كباية شاي ..

= طيب و "ريم " يا نجم ؟

_ على فكرة إنت ممكن تختار لي إسم بدل تعبيراتك اللطيفة دي

= حسميك "سوسن"

_ أوك ...مش بطال..

= طيب يا "سوسن" قوللي ...أشتري إيه لـ"ريم "

_ في سيلانترو حنفكر مع بعض بهدوء....

***

حكيتُ لـ i understand قصتي الكاملة مع عملي في الميديا , أنا لا أكره مهنتي على عكس ما يعتقد زملائي , لست ثوريا فيما يتعلق بالدعاية و الإعلان , ولا أدّعي أني أبيع أوهام أو أكاذيب لأرضي عملائي , أنا أصلا من طبقة تعتبر أفضل مهنة تمثلها هي الدعاية و الإعلان , شاب لطيف من الإسكندرية , من عائلة كبيرة و مرتاحة , قرر أن يدرس و يعيش مستقلا في شقة مصر , و لذلك فأنا موديل جاهز للإعلان عن أي شئ , يعيش بأسلوب يروّج لمتع و سلع كثيرة في شكلها الأكثر سينمائية , ليس لدي مشاكل مع ذلك , فقط أنا أشعر أن هذا المجال يقحمك في مجتمع يحوّل أساليب عمله إلى أساليب تعامل يومي , كيف تبيع خلال حديثك الصباحي مع زميلك في العمل ؟ , كيف تبيع له فكرة أنك خلقت لتكون director creative أو copywriter , حتى ولو لم يكن هذا الزميل ذا صلاحيات أو علاقات ..فقط بِع ْ , قبل أن يكون هناك ثمّة شئ لم تبعه فاتتك فرصة الكسب منه..

_ اشتري لـ "ريم " كتاب أو أسطوانة موسيقى..

= تفتكر إني بحب "ريم " ؟

_ السؤال ده بيسأله أي راجل لنفسه بعد شهرين من أي علاقة بأي بنت سواء بيحبها أو مبيحبهاش..

= جاوب من غير فلسفة و حياة أمك..

- حتى لو مابتحبهاش..تقدر تعيش من غيرها..؟

= والله أنا فعلا عايش من غيرها..بس حاسس إني عايز أعيش معاها..مش عارف عايز ده يستمر بقية حياتي ولا لأ...ممكن لو إتجوزنا كل حاجة تتغير..

- طيب أنا بعد إذنك محتاج أرتاح شوية , حطني في الشاحن , قربت أفصل من التعب , حنكمل كلامنا بعدين.

شعرت بإفتقاده مسبقا , أغلقته لأني نسيت الشاحن في البيت..

***

استهلكت كل طاقتي في حملة شركة موبايل جديدة تستعد للمنافسة في السوق , في البيت وضعت "
سوسن " في الشاحن , ابتسمت في إرهاق من اسمه الجديد , فتحته فتثاءب وهو يقول: إيه أخبار يا أُسّ...عملت إيه ؟...

- ماجبتش هدية لـ "ريم " رجعت على الشغل عشان أخلّص اللي ورايا...قابلت في سيلانترو " داليا " زميلتي في الجامعة و قعدنا نرغي لحد ما الوقت سرقنا..

= حبيب قلبي يا "أسامة " والله..

- بقولك إيه..دي مجرد زميلة

= تشوفليش إسم الـ i understand بتاعها إيه ؟..

_ هههههههههههههههههههههههههههههههههههههههههههههههههههه..و إيش عرفك إنه حيبقى بنت...

= على رأيك..غالبا حتكون عاملاه بصوت أحمد الفيشاوي..

انشغلت في البحث على الإنترنت عن " i understand " على سبيل التسلية..

= شكلك مبسوط إنك كلمت " داليا " ؟

التفت إليه و أنا مشتت الذهن تماما ,صمتّ للحظة..

- جدا..بس ده ملوش أي معنى

= ده حقيقي..

- هو أنا خاين يا "سوسن " عشان بكون مستمتع لما بتخيل إني أنا و داليا مع بعض في الـ..؟

= عادي جدا...فانتازي إز أن أوذر وورلد يا " أسامة"..

- يا جامد ..

= بكرة عدّي على الشروق في وسط البلد وهات الكتاب لـ"ريم "يا أسامة و ريّح نفسك..إنت مش حترتاح إلا لما تتصالح إنت و ريم..

الجهاز انفجر كالوباء في جميع أنحاء العالم رغم ثمنه المرتفع نسبيا , عدة تيمات للدعاية خلقت له اسمه الشائع.." i..u " أو الأكثر إتقانا " i..you "..تخيّل أن في جيبك مستشار لحظي و ظريف و ذكي و كتوم , تختار له شخصيته و صوته و خبراته التي تحتاجها و يطوّر نفسه بشأنها , يسمع و يقترح و ينصح و يذكّر و يبحث...مطوّر بشكل يجعل الحديث معه غير متوقع أو غير آلي..تحت شعار ترويجي ضخم : " يغيّر حياتك..حتى قبل أن تلاحظ "...

تثاءبت..

_ أنا عايز أنام..تصبح على خير

= و إنت من أهله...تحب أفكرك بكرة بحاجة ؟

أغلقته و دخلت لأنام..

***

" داليا " من البشر القادرين على الحديث عن " I you " و "Nokia N90 " و لابتوب " HP " لمدد تزيد عن النصف ساعة , ورغم أني أعرف أنها تفعل ذلك كطقس حميمي تماما , إلا أن مثل هذه الحالات تجعلني أبدأ في الشعور بالرغبة الضاغطة في التهكم ..كانت في المرة السابقة قد قالت شيئا بخصوص شركة دعاية خاصة تفكر في إنشائها , لذلك ربما بدا لها مقنعا جدا أننا لابد نلتقي في سيلانترو لنتحدث عن بعض التفاصيل , كما أخبرتها في الموبايل , , دون أن يبدو أننا مثلا نريد قضاء وقت لطيف , أو نمهّد ربما لعلاقة ما..

كان على الطاولة المقابلة لنا شابة أنيقة تتحدث إلى الـ "I you " الخاص بها عبر سماعة أذن أكثر أناقة و بملامح ثابتة تماما , بينما بدأت داليا تسرد لي تجربتها مع " مي مِنْتو " , الـ " I you " الخاص بها , الذي جعلته يتحدث معها بالإنجليزية بصوت " جورج كولوني " ,و كيف سمعت أكثر من مرة الإنذار الذي اختارته لمحاولات التلصص , يصرخ فيه كولوني بحنق : Son of a bitch , و ذلك في كل مرة كانت تترك جهازها مع صديقة لها في كافيه أو في البيت أو في العمل..

أخرجت " سوسن " من جيبي و أنا أفكر أنه الآن الوقت المثالي للعبث المطلق , فتحته بينما تتابعني " داليا " في فضول...

_ "سوسن " باشا...داليا بتسلم عليكم..هي معايا دلوقتي في سيلانترو جامعة الدول..تفتكر لو حبيت أجيب لها هدية حتكون إيه ؟

= إزيك يا أسامة.سلملي عليها..أفتكر إنها لازم تكون هدية بسيطة مناسبة لصداقة جديدة أو علاقة زمالة قديمة..

- زي إيه يا عم الفيلسوف..

ضحكت داليا بينما تأخرت إجابة " سوسن " قليلا..

= ممكن تجيب جراب " i you " الجديد من " virgin " ميجا ستور ..

_ أها

= و متنساش الأهم...تجيب هدية " ريم "..

تجمدت " داليا " , ظللت أنظر لـ "سوسن" قليلا , و رغم أني توقعت حدوث شئ مماثل , فقد كنت أفكر فيما يجب أن أقوله الآن و فورا..

قلت و أنا أغلقه و أضعه في جيبي متصنعا الحرج : جهاز سخيف..

ردّت "داليا" بصوت حاولتْ قدر الإمكان أن يبدو لا مباليا : لا عادي.."ريم" أخبارها إيه صحيح

_ بقالنا كتير ما شفناش بعض..

العلاقات الخفيفة , التي لا تعوّل عليها كثيرا , تسمح لك بأن تجرّب أشياء كثيرة بالفعل , تراجع تكتيكاتك و تقيّمها دون أن تقلق من خسائر حقيقية , عبارتي الأخيرة لداليا كانت تطرح دلالتين:

_ أنا الآن غير مرتبط..الطريق متفوح أمامك عزيزتي المزّة

_ قد أكون حزينا لأنني لم أر "ريم " منذ فترة..لكنني لا أسعى لأن أراها فعليا..

" بتفكر تجيب لها هدية زي إيه ؟ " .. عقدت ساعديها أمام صدرها و وضعت ساقا على الأخرى.."مفيش.. الموضوع إني كنت فتحت الموضوع مرة مع ( سوسن ) من فترة طويلة "..صمتنا للحظة أمسكت بعدها بـ "مي مِنْتو " و أستأذنتني للذهاب إلى الحمام..عندما عادت إتفقنا على أن نلتقي الخميس القادم في نفس المكان..

***

_ أقدر أعرف إيه اللي هببته في سيلانترو ده ؟

= هببت إيه ؟

_ هو إيه اللي متنساش الأهم..مالك إنت إيه الأهم ؟

= إنت مش قلت " داليا " مجرد زميلة..

_ طيب إيه اللي يجيب سيرة "ريم " يابني آدم إنت في حوار زي ده

= كنت بفكرك بهدية "ريم"..

كنت مبتسما من البداية..

_ عايز أسمع موسيقى طيب...عندك إيه ؟

= جميع إصدارات البشرية من بداية التاريخ إلى يوم 5 إبريل 2008 , ممكن تعمل update من لوحة التحكم , أجيبلك اللي نزل بعد كده و سامبلز من الشرايط اللي لسه حتنزل..

-طيب إعمل دلوقتي Update و شغلي جاز و بعدين أغاني لشيرين و بعدين شوية موسيقى كلاسيك ..

بدأ " سوسن " في التنفيذ ...

أضاء فجأة

= فيه حفلة جاز قريب في قصر محمد علي في المنيل ممكن تبـ..

_ ممكن ما تبقاش تعمل الحركة دي تاني..

= طيب

سرحتُ في التعديلات التي طلبها مني "ربيع " على الحملة الأخيرة , أخبرته أننا لابد ان نتناقش لأنه لا يمكن أن أعمل على الأفكار بعد تعديلها إلى ما يشبه فقرة نكت قديمة ..

_سوسن...عايز نشرة أخبار دولية..

لم يستجب..

_ سوسن

= أردّ؟

_ أيوه

= حتسمع أخبار دولية دلوقتي من الـ CNN و الـ BBC

انطلق سوسن بصوته الرزين بينما انشغلت في نفس الموضوع...

قاطعته :

- تفتكر إنه شئ كويس تشتغل مع صاحبك

=كل شئ في الدنيا نسبي..

_ "ربيع " بقى بيشتغل في القسم اللي بيراقب جودة كل شئ في الشركة و تطويرها..كتير جدا بسمع منه تعليقات على شغلي منها تعليقات سلبية وده مش مريح ليا بصراحة...يمكن عشان إحنا أصحاب و مش عايز حاجة تبوّظ الدنيا..

= إنت محترف..إشتغل بشكل إحترافي ومتخليش أفكار شخصية تعطّلك..فيه كتاب جديد في علم الإدارة لأندي هوبكنز إسمه " كيف تدير مديرك" ...كتاب هايل..حتلاقيه في.

- أنا نازل أشتري حاجة أكلها ...عايز حاجة ؟

= أيوه...شيكولاتة كيت كات

شيكولاتة كيت كات هي النوع المفضّل لي..

***

أغلقت باب السيارة بقوة , تشاجرت اليوم مع "ربيع " بشأن تعديلات قسم البحث و التطوير غير المحتملة تماما عن أفكاري لحملة شركة المحمول , "ريم " لا تزال , بعد الكتاب و الكارت , تعاقبني و لا تردّ على مكالماتي..زفرت بقوة و أنا أفكر في أشياء سيئة كثيرة بخصوص بشر كثيرين..

- معلش يا " أسامة "

= عايز إيه إنت راخر..

تحركت بالسيارة في سرعة إلى أي مكان..
- معلش..مفيش حاجة مضمونة 100 %...ممكن تجرب إنك..

= بقولك إيه ..إطلع من نافوخ أهلي و بطل النشرة بتاعتك دي..سمعنا إقتراحاتك و مطلعناش بحاجة..

- مش صحي إنك تعتمد على إقتراحات صوت واحد بس ...زي ما قلت لك..مفيش رأي مضمـ..

= ممكن تخرس..

- إنت ليه بتكلمني كده ؟

= أكلمك زي ما أنا عايز يا روح أمك..

- أنا مش شغال عندك عشان تكلمني كده..

= !!!!

تناولته و ألقيته مباشرة من الشباك...

***

دخلت البيت , ألقيت بكل ما في يدي على الكنبة , جلست على اللاب توب أراجع تعليقات قسم الزفت و التزفيت على أفكاري..." عايز أشرب شاي "...قلت و أنا أقوم من على الكنبة..

- ممكن تروح سيلانترو المعادي...قريب من بيتك..

كنت قد توقفت على بُعد شارعين بعد أن ألقيته , عدت و ألتقطته من الشارع , كان لا يزال سليما..

=قال مش شغّال عندك قال..

قلت بخيبة أمل و مزاج سئ تماما ...

أضاء مرة أخرى...

_ طيب ليه كنت بتسمع كلامي ؟

قالها في خفوت و بصوت تعيس..

= عشان أنا كنت عايز أسمع كلامك..إنما تستفزني وقت ما أكون متضايق يبقى ينعل ميتين اللي جاب أمك..

- إحنا أصحاب يا "أسامة"...لو عايز يبقى بينا علاقة صحية...يبقى بلاش تعاملني كده..

= أما حاجة بنت وسخة صحيح.. علاقة صحية ؟! ... يابني إنت مجرد آلة.. .حاشرينك تفاصيل منتجات و إقتراحات و أسماء ماركات أكيد بتموّل شركة الخرا اللي صنعتك..ما تستفزش أمي..أنا يا روح أمك شغال في شركة إعلانات و فاهم كويس إنت بتشتغل إزاي و عمال تكلمني الأسبوع اللي فات على أساس إيه و عشان أعمل إيه..علاقة صحية إيه يا روح أمك..إنت بتبيع طول الوقت..بتبيعني شخصيا لصالح اللي مطوّرينك..

= طيب مادام فاهمني...و عارف أنا بشتغل إزاي...إيه اللي مضايقك ؟

قال المقطع الأخير من عبارته بنبرة منخفضة و بطيئة...

تركته و دخلت المطبخ..

عدت بكوب شاي و سيجارة..جلست جواره أمامه اللاب توب

- إنت جهاز بائس يا "سوسن "..

= كإني مش عارف..

- طيب ممكن تسكت عشان أعرف أشتغل

= أوك..

التفتّ للاب توب فبدأ يُسمعني موسيقى خافتة و هادئة تماما , بالضبط كما أحبها و انا أعمل..