photo album

1

عارف يا "سيد ", أنا من ساعة ما دخلت على الفايس بوك و أنا حاسس إني بدأت أكره ربنا ,عارف حتقعد تقولي أستغفر الله العظيم و بتاع , بس أنا بقولك بصراحة , أنا قلت له كده أصلا , ما أصلي حكذب عليه حروح فين يعني , هو عارف إني حاسس كده , و أنا بقولك إني بدأت أحس كده , معرفش بقى ده يتحسب ولا مايتحسبش , بس هو أصلا إنت عايش عشان تتحاسب يا "سيد " ؟, بذمة أمك إنت عايش , بتخرج تلف بدين أم التوكتوك بتاعك طول اليوم و عاملي فيها باشا على الركاب و مشغل الكاسيت و عامل فيها متمزج...إنت متمزج يا سيد ؟ , أنا كمان طول اليوم بقعد في السايبر بن الوسخة ده أسمع أغاني , أحاسب في عيال بنت كلب ملهاش معالم كلهم شبه بعض و أنزّل أغاني و أفلام و في الأخر حيحصل إيه , حنتجوز و نخلف عيال و نموت و عيالنا يركبوا تكاتك و يقعدوا في سايبرات , عيشة بنت قـ*بة أصلا , أنا شاكك إن ربنا شايفنا يا "سيد"…إتنسينا باين ولا إيه مش عارف …تعالى إتفرج يا عم الناس عايشين إزاي ...خش على أي بروفايل من دول يا سيد...البروفايل ده يعني زي البطاقة كده..عليها كل تفاصيلك ...بص إنت حمار أصلا و لا بتفهم دين أم أي حاجة في الكمبيوتر فمتقعدش تسأل كل شوية و خلاص...أنا حوريك اللي عايز أوريهولك ..إنت تعمل بحث على أي إسم..مثلا "سارة "..تطلع لك القايمة دي...تدور فيها بقى على بروفايل ينفع تفتحه....بس تخش بقى و تشوف كل حاجة ...بس أنا حدخلك على المفيد على طول... أنا عارف كام بروفايل ينفع نخش عليهم ..مثلا " سارة علي " دي..عندك بقى كذا حاجة...يا إما تدوس على صورتها الكبيرة دي فيجيبلك كل صورها...يا إما تدور في البروفايل ساعات تكون هي حاطة ألبومات... ما تفهمش بقى عايزة الناس تشوفها ولا نسيت تقفلها على اللي متعرفهومش...يا إما تدوس على الميني فيد دي ...آه ميني فيد يا روح أمك مش كنت في معهد و بتعرف تقرا إنجليزي...تلاقي فيها ساعات صور ليها...صور لصحابها هي معلقة عليها...صور ليها عند أصحابها حطوا إسمها عليها ..و عيش ...أهي سارة دي مثلا في الإيه يو سي , عندها 22 سنة و ساكنة في الدقي..إيه يو سي يعني جامعة أمريكية يا جحش...شوف ...كل دي مزز...شوف زميلها حاطط إيده على وسطها إزاي..إنت آخر مرة أصلا لمست بت كان إمتى يا سيد ؟....إستنى...أهو ألبوم كامل متصوراه في المصيف...عمرك رحت مصيف يا سيد ؟...راس البر ؟...أشخر لك يعني ولا أقول إيه..إنت فاكر ياض البركة اللي بتلبلط فيها إنت و أمك دي بحر...أهي سارة دي بتروح أسبانيا كل سنة ....يا دين أمي..إيه المايوهات دي...مش مكسوفة حد من زمايلها يشوفها كده ؟...شايف يا "سيد".....عندها عربية لو قعدت أحوش من دلوقتي لحد ما أموت مش حجيب أول قسط فيها..و ربنا ياعم....ربنا يفتح عليا ؟...طيب ولو ربنا كاتب أفضل فقير...أعمل إيه ؟..أقضيها فرجة ع النت..إستنى ندخل نشوف حد من أصحابها ..شوف "ميزو " ده...واد عنده 23 سنة...شوف بقى كل دول بنات أصحابه...نام مع كام واحدة فيهم ؟...سافر كام مرة ؟...أهي دي عربيته ..وده بيتهم متصورعلى حمام السباحة......واحد زي ده حاقف جنبه إزاي يوم القيامة ؟... حيقرف من ريحتي أصلا...انا طالع دين أمي في السايبر وهو كاتبلك لسه بيدوّر على نفسه...أحسن منك في إيه ده يا "سيد " ؟...إشمعنى هو نايم على حمام السباحة و إنت ضهرك إتاكل من المسند الحديد...ربنا حيحاسبنا زي بعض إزاي طيب..أحسن مننا في إيه دول يا سيد عشان ربنا يديهم كل ده في الدنيا و إحنا لأ..لازم نستنى للآخرة يعني يكون طلع دين أبونا و كفرنا و دخلنا النار ؟...أيوه حنروح النار .. أنا كل يوم بخش أتفرج على حريمهم ...طول اليوم أقلب على الفايس بوك و أسيّف في صور..وهما أنجاس ولا بتفرق معاهم حريمهم تطلع عريانة في الصور.. وربنا ما حتصدق.. مرة كنت في نايل سيتي ...المول ياض اللي قبل أركاديا من ناحيتنا هنا....كنت مع شعبان بن عمي بشوف شغل في أي داهية هناك ..فجأة لقيتلك واحدة من اللي أنا مسيّف صورهم دول

واقفة قدامي...ورب الكعبة يا عم ..ليها صور عندي هنا وهي في أوضتها و في المصيف و في النادي ومع أصحابها و لما كانت في ثانوي كمان....تخيل بقى لما ألاقيها قدامي كده فجأة..كنت حاشاور لها من بعيد...حسيت ياض كإننا نعرف بعض من زمان ..بس قلبي إتقبض ...كانت داخلة سينما مع واد يا "سيد " إتولد في جيمّ ..واحدة زي دي أنا محلمش تاخد بالها إني واقف أصلا..محلمش مرة إنها تكلمني ...عارف ساعتها حسيت بإيه ؟...كنت عايز أروّح معاها...وربنا ياعم ما فكرت في الأفكار النجسة بتاعتك دي..كنت عايز بس أروّح معاها...أدخل أوضتها...أقعد على حمام السباحة اللي عندها في الفيلا...أروح معاها النادي..أتمشى معاها في الجنينة...أقعد معاها ومع أصحابها..أشوف كل الأماكن اللي بشوفها فيها في الصور...و اللي عمري ولا عمرك حنشوفها يا "سيد "...شايف الكافيه اللي "ميزو "قاعد فيه ده...عمرك ما حتخشه في حياتك يا "سيد"..إنت متخيل؟...عمرك ما حتخشه...حتى لو سرقت و جبت فلوسه...حيعرفوك على الباب...وربنا حيعرفوك على الباب..حيوقفوك و يروحوك بيتكم...إحنا حتى مش شبههم يا "سيد"....حتى مش شبههم ...تعالى بقى أقولك حنعمل إيه..

2

إمبارح يا خالد و أنا بحمّل صوري أنا و أمنية في الساحل الفايس بوك كان واقع باين , مش راضي يحمّل غير صورة صورة بالعافية..فقلت ينعل أبو كده مش ححمّل حاجة..و أهي الصور عندي أبقى أبعتها لأمنية على الإيميل في أي وقت و خلاص ....فتحت الصور و قعدت أتفرج عليها تاني.. بس حسيت إن مزاجي مقلوب..كإن فيه حاجة ناقصة إن الصور مش موجودة على الفايس بوك..مش عارف أستمتع بيها زي بقية الصور اللي عندي على البروفايل..كإنها لسه في الكاميرا أو لسه مش موجودة...تفتكر ليه مش عارف أستمتع بالصور و هي عندي على الجهاز ؟......حاجة غريبة.. صح ؟...طيب ما أنا كنت هناك فعلا !..برضه تحس إن الصور لازم أصحابك و أصحابها و زمايلك في الكلية يشوفوها عشان تحس إنك مبسوط...حسيت بكده قبل كده يا خالد ؟...إنت نفسك قلتلي قبل كده إنك بتكون مستمتع أكتر لما تسمع أغنية بيسمعها معاك ناس تانيين في نفس الوقت..في الراديو مثلا أو في حفلة على البلاج..أو حتى في كاسيت عربيتك...طيب تعرف إني و أنا بصور نفسي أنا و أمنية هناك في الساحل كنت بفكر في شكلنا على الفايس بوك...حتى قبل الفايس بوك ما يطلع..كنت بصور نفسي في كل سفرية طلعتها عشان أوريها لأصحابي..أنا كنت فاهم إني لو مبسوط في حياتي فيبقى ينعل أبو الناس مش حيهمني أوري حاجة لحد...و أنا مبسوط فعلا..الهاي فايف كان حاجة حقيرة بالنسبة لي...مش فاهم ليه الفايس بوك بقى بيخليني أفكر ححط عليه إيه...و حكتب إيه...و أتصور فين ؟..هل معنى كده إني مش سعيد مع أمنية مثلا ؟.. عايز أثبت للناس إننا مبسوطين مع بعض ؟... طيب حسيت بالموضوع ده قبل كده و إنت بتتصور مع سارة يا خالد ؟

3

Khaled says :

سارة إنتي لازم تشيلي صورك من على الفايس بوك يا إما متخليش مسموح لأي حد يشوفه غير أصحابك البنات بس..

Saso says :

=إزيك يا خالد...خير في إيه بس اللي حصل؟

Khaled says :

_حيوان عامل أكاونت على الفايس بوك بإسم سيد البرنس باعتلي رسالة... إتفضلي شوفي

Khaled says :

Sayed el prince sent you a message

غطي لحمك ياريس

خلي خطيبتك تشيل صورها العريانة

أنا حبيت بس أقولك عشان فيه ناس بتفتح صفحتها و تتفرج عليها

مع تحيات أخوك

سيد توكتوك

--------------------
To reply to this message, follow the link below:
http://www.facebook.com/n/?inbox/readmessage.php&t= 1005803121114

Saso says :

إيه القرف ده ...مين سيد ده يا خالد ؟

Khaled says :

أنا معرفش الحيوان ده ..ولا هو حاطط أي حاجة على البروفايل .. أكيد حد عمل البروفايل ده عشان يعرف يبعت لي منه رسالة زي دي

Saso says :

طيب ليه حيعمل كده ؟

Khaled says :

أي حيوان عايز يضايقني

Saso says :

طيب أنا ذنبي إيه

Khaled says :

ملكيش ذنب بس مينفعش تفضل صورك كده فعلا متاحة لكل الناس

Saso says :

ومالها صوري يا خالد !

Khaled says :

ملهاش..بس بعد إذنك شيليها يا سارة عشان أنا متضايقش

Saso says :

يا خالد متوجعش دماغك عشان حيوان زي ده

Khaled says :

حتفرق معاكي إيه طيب لو شيلتي الصور أو حطيتي بس اللي ممكن أي حد يشوفه

Saso says :

حد قالك إني حاطة صوري بالبكيني يا خالد ؟

Khaled says :

ما هو ده اللي ناقص فعلا

Saso says :

خالد بعد إذنك متكلمنيش كده ثم دي حاجة ترجعلي

Khaled says :

يعني إيه حاجة ترجعلك ؟ الصور دي لازم تتشال

Saso says :

هو إيه اللي لازم تتشال هو كفاية جدا عشان خاطرك أخلي البروفايل مقفول على صحابي و انا أصلا كنت فاكرة إن مش أي حد ممكن يشوفه

Khaled says :

مقفول على صحابك البنات بس يا سارة

Saso says :

إنت بتهزر يا خالد ! صحابي البنات و صحابي الولاد..

Khaled says :

أصل أكيد اللي بعتلي الرسالة دي يعرفني و يعرفك يا سارة و أنا معنديش إستعداد حيوان زي ده يكون بيقدر يشوف صورك

Saso says :

صوري مفيهاش حاجة يا خالد

Khaled says :

لأ فيها و إنتي في النادي و في البيت و على حمام السباحة كمان

Saso says :

طيب ما الناس على حمام السباحة أو على البحر بيشوفوني بالمايوه و بيبقى معانا كمان أصحابنا الولاد اللي منهم اصحابك إنت كمان

Khaled says :

ممكن يا سارة بعد إذنك من فضلك تخلي صورك ميشوفهاش غير أصحابك البنات

Saso says :

أصحابك البنات...أصحابك الولاد..أنا مش في مدرسة يا خالد

Khaled says :

طيب يا سارة إنتي حرة

Saso says :

أيوه طبعا انا حرة

Khaled appears to be offline

4

يا أمنية مينفعش.....تخيلي إنتي طارق بيقولوك متخليش حد يشوف صورك إلا أصحابك البنات.. خالد عارف إني ده لبسي و إن دول أصحابي و قبل المسج الزفت دي كان عارف إني حاطة صوري و كل أصحابي بيشوفوها ثم انا مش حاطة صوري و انا واخدة بوزات موديلز..أنا حاطة صوري العادية..يعني إيه لازم أسمع كلامه..هو أنا بهيمة بيجرها مطرح ما هو عايز..طيب فاكرة لما طارق كان معترض إنك تحطي صورتك في البروفايل و عايزك تحطي أي صورة لأي حاجة تانية..ما إنتي قلتي إنك مش عورة و إن الناس بتشوف وشك في الشارع .. أنا خلاص قفلت بروفايلي على أصحابي محدش حيشوف بروفايلي غيرهم , بس هو يعني اللي عايز يأذي حد حيروح واخد صورته و يقعد يعمل عليها أفلام...بتحصل؟..طيب ما كل حاجة بتحصل يا أمنية نقعد في بيوتنا بقى و نخبي وشنا في الشارع لا حد يصورنا و يستخدم الصور دي في أي حاجة..ناقص كمان خالد يقولي منزلش البسين أو البحر قدام قرايبي ولا أصحابي ولا أصحابه الولاد.. ماهو ده اللي ناقص فعلا..ما هو أي حد ممكن يشوف صورك يا أمنية لما حد من أصحابك البنات يعلق عليها...كل أصحابها حيشوفوها عندها على البروفايل..بصي يا أمنية...أنا مش حشيل ولا صورة من اللي أنا حاطاهم..

5

قلت لك قبل كده يا طارق متحطش صورنا في الساحل على الفايس بوك قبل ما توريهاني..مينفعش أصلا أي حد يشوف صور زي دي..إحنا لسه مخطوبين ..أيوه اللي في الصور ده حصل فعلا بس في فرق إنه يحصل بيني و بينك و إن بقية الناس يشوفوه..أنا مش مكسوفة من حاجة يا طارق بلاش عصبية..لكن الناس حتقول إيه على إتنين متصورين على البحر مع بعض عمالين يلعبوا و يضحكوا..يعني لو كان ليا أخ ولد كان ممكن يتضايق..ثم إن الصور كتير بتدي إنطباعات مش حلوة..و أنا معرفش كل أصحابك على الفايس بوك عشان يشوفوني و انا بطلع لك لساني يا طارق أو قاعدة براحتي جنبك في العربية...ثم ممكن أطلب منك طلب..ممكن تشيل كل صوري اللي عندك و تبعتهالي و أنا أرجعهالك تاني من غير الصور اللي مش عايزة حد يشوفها..يا طارق إفرض حد من أصحابك فتح جهازك ؟..نعم ؟..منتصورش تاني أحسن ؟...أوك أنا موافقة..معنديش أي مشاكل..منتصورش تاني أحسن... أنا مش حستنى لحد ما يحصلي اللي حصل لسارة..إيه...إنت بتقول إيه ؟!...رسالة إيه دي اللي وصلتك ؟!!

6

زي ما قلتلك يا ميزو انا معنديش مشاكل مع صور سارة , أنا ساعات بخش أتفرج على صور أصحابها البنات لما بلاقيها معلقة على صور ليهم أو واحدة فيهم صورتها تعجبني و يكون بروفايلها مفتوح , الناس أساسا طول الوقت بتتفرج على بعض , اللي ضايقني إن حد ييجي يقولك إنه عمل كده.. أو تحس إن واحد تعرفه و بتشوفه كل يوم هو اللي يقولك إنه بيعمل كده.. عشان كده تعرف أغبى حاجة أنا عملتها كانت إيه؟..إني قلت لسارة…كنت المفروض ما أقولهاش أي حاجة..مكنش حيحصل أي حاجة..

7

Sayed el prince sent you a message

مش عيب تسيب أختك كده

خليها تشيل صورها عشان كده عيب يا أبو رامي

فيه ناس بتفتح صفحتها و تتفرج عليها

مع تحيات أخوك

سيد توكتوك

--------------------
To reply to this message, follow the link below:
http://www.facebook.com/n/?inbox/readmessage.php&t= 10058345778

Hamada cyber sent you a message

إنتي مزّة فحت يا دينا

صورك كلها متسيفة عندي

بفكر أعملها بوسترات

مع تحيات الزعيم

حمادة سايبر

--------------------
To reply to this message, follow the link below:
http://www.facebook.com/n/?inbox/readmessage.php&t= 1005801605

Sayed el prince sent you a message

ياراجل شيل صورك اللي إنت حاططها مع مراتك دي

إيه مفيش رجولة خالص؟

عالم خـ*لات صحيح

--------------------
To reply to this message, follow the link below:
http://www.facebook.com/n/?inbox/readmessage.php&t= 10058331908

Hamada cyber sent you a message

حمادة سايبر بيصبح و يمسي

صاحبتك مزّة أوي يا ميزو

عندها مواهب كويسة

لقيت نفسك ولا لسه يا روح أمك؟

--------------------
To reply to this message, follow the link below:
http://www.facebook.com/n/?inbox/readmessage.php&t= 100580319087