Thursday, June 5, 2008




Gigolo




أهلا بيكم في حلقة جديدة من برنامجكم المفضل جدا "just do it " ..
إزيكم كلكم عاملين إيه.. زي ما بعمل كل مرة , حختار لي النهاردة إسم جديد و ليكن مثلا... "جيجولو"...
أهلا بيكم معاكم "جيجولو" لمدة ساعة على الهوا نتكلم عن أي حاجة..
طبعا ممكن بكرة ألاقي حد بيشتمني في الصفحة الأولى عشان إخترت إسم زي ده .. ههههههههههههه..بس غالبا ده مش حيكون له أي أهمية..أنا حر أسمّي نفسي اللي أنا عايزه ..هههههههههههههههههههـ.... ببساطة أنا مش عايز أكون نموذج مشرّف للمذيع الناجح..أنا مش مذيع في الحقيقة..أنا جيجولو..ههههههههههههههههـ.و بتكلم في الميكروفون ده عشان أقضّي وقت فراغ لطيف..بس على الأقل ممكن نقول إن محدش حيسهر لحد الساعة إتنين بالليل و يفتح الراديو عشان يسمع نموذج مشرّف ..
و بالتالي..مستمعيني الغير منتظرين لقدوة على الهوا النهاردة , معاكم : "جيجولو"...
وصلتني إيميلات من ناس عايزة تعرف إسمي الحقيقي...و حقولكم تاني رأيي اللي بوافق فيه كاتب لاتيني مش فاكر إسمه في رواية مش فاكر إسمها ...بيقول إن السر عبارة عن هرم من ورق الكوتشينة...لو بأي شكل شلت ورقة واحدة ..بقية السر كله حينهار إن عاجلا أو آجلا.. بس .. ف لو قلت إسمي الأول حتعرفوا أنا مين بالكامل و بشرب إيه فين و ليه ... يعني بقية السر حيتسرسب ورقة ورقة....أنا برضه مش شايف أي أهمية لإسمي....أنا جيجولو...معاكم لمدة ساعة.....بكرة حيكون حد تاني..فأفضل طريقة نستمتع بيها دلوقتي ... إنكم ... تتصلوا ... بيا ....

حستناكم بعد تامر حسني...


ويلكم باك...هاو دو يو دو....أول إتصال...
_ ألو
=أيوه أهلا بيكي مين معايا
_ أنا سارة... إزيك يا جوجولو..
=هههههههههههههههههـ....جيجولو يا دينا...أنا جيجولو....لوك إت أب...بصي عليها في القاموس
_ اها أوكي....إنت إيه أخبارك ليه إمبارح مكملتش حكاية المخدة البمبي ؟
=ممممم...مش فاكر يا سارة بصراحة...ههههههههههههههههههههههههههههـ....أنا مش فاكر أصلا إيه قصة المخدة البمبي دي.....إنتي متأكدة إنك كنتي بتسمعي نفس البرنامج ... ههههههههههههههههههههههههههه..
_ أيوه طبعا !
=طيب يا سارة ...حنتفق...إمبارح ده إنتهى من التاريخ خلاص....يعني إحنا دلوقتي فوق طوبة متعلقة في الفضاء إسمها النهاردة..وراها فراغ...قدامها فراغ...سارة أنا عايزك تغني لنا دلوقتي الأغنية اللي كانت شغالة و من غير تردد فورا
_ طب قبل ما تمشي..خليني..أبكي في حضنك شوية....قبل ما تمشييييييييييييييي.. خلييييييييينييييييي..أبكي في حضنك شوية...
=ذاتس ماي أوديانس....هو ده جمهوري....صوتك وحش أوي يا سارة
_ههههههههههههههههههههههههههههههههههههههههه..أصل أنا حامل دلوقتي فأكيد ده مأثر على صوتي...أنا صوتي جميل أصلا
=أوكي يا " آنّا كارنينا " أنا حقبل عذر زي ده بس يا ريت الإتصال الجاي يكون بعد 9 شهور ...
_ أنا إسمي سارة مين آنّا دي..
=أنا قررت أسميكي آنّا كارنينا....واحد صاحبي قاللي إن إسمها آنا كاريننا مش كارنينا ...بس مش مهم...إنتي جميلة يا سارة ؟
_ آه ..يعني.
=أقدر أعرف ليه واحدة إسمها سارة و جميلة و حامل سهرانة لحد دلوقتي بتسمع راديو بيتكلم فيه واحد مسمي نفسه جيجولو ؟
_مفيش...بضيّع وقت...
=إنتي شايفة إن ده كويس ؟
_ طيب ما إنت قلت في الأول إنك بتضيع وقت يا جيجولو..هههههههههههههههههههه
=سيبك مني ...أنا مش نموذج مشرف زي ما قلت...إنتي إيه رأيك ؟
_ عادي...مش بعمل حاجة غلط
= بس ممكن حد يقولك إنه مش صح إنك تضيعي وقتك تكلمي جيجولو و المفروض تكوني دلوقتي بتعملي شئ كويس...
_إنت عايز إيه ...ههههههههههههههههههههههههههههههههههههه
=جوزك وسيم يا آنّا ؟
_يعني...آه
=ممل ؟
_هو مش ممل...هو بس كتير مش بيعرف يخليني أعرف أتكلم كويس معاه
= ههههههههههههههههههههههههههههههههههههههههههههه....لا لا يا سارة... بلاش كده...الناس اللي بيسمعونا يقولوا علينا إيه دلوقتي...الحوار مبتذل جدا....بتكلم مع واحدة حامل و بتحكيلي عن مشاكلها الزوجية .. هههههههههههههه ...كده ممكن أحس إني أسامة منير....ههههههههههههههههههههههههههههههههههههههه....بصي يا آنا ....أنا حاسس إنك مؤهلة جدا تكوني آنا كارنينا...بس إنتي مش حينفع تكوني آنّا كارنينا.. و جوزك ممل يا آنّا...أنا حاسس إنك أصلا متعرفيش مين آنا كارنينا ..هههههههههههههههههههههههه. إنتي إتصلتي قبل كده بأسامة منير ؟
_ كتييييير.....كنت بحكي قصص وهمية و أقعد أعيييييييييييييط كإني عيشتها بالظبط....
=أهااااااااااا....ويلكم آنّا.....طيب تحبي تحكي أي قصة وهمية
_ لأ..
=ليه ؟
_عشان إنت مش أسامة منير...
=ثانك جود ! أشكرك جدا يا آنّا ...بس على كل حال أنا حاسس فعلا إني بقيت أسامة منير....أهلا بيكم..معاكم أسامة منير...ناخد إتصال تاني...
_ألوو
=أيوه يا نجم , إسمك ؟
_ على فكرة يا جيجولو...إنت خـَ *لْ
=هايل
_ و إبن متـ**** و عيل إبن مرة **** و شر**ط
=جرييييت....كمان
_ و عِلـ *...هههههههههههههههههههههههههههههههههههه
=Damn..كمان
_ و مادام جيجولو بقى...إنت بتتـ*** بربع جنيه مخروم
=ذاتس ماي بوي..." نجيب محفوظ", إنت حررتني... u freed me..إنت ملهم يا "نجيب"...إتصالك دلوقتي رفع أسهم برنامجي للسما...ههههههههههههههههههههههههههـ...منتج البرنامج أكيد دلوقتي بيرقص بالروب وهو في إيده كاس ويسكي في فندق معرفوش.....إنت بتتمتع بشئ مهم جدا يا نجيب...إنت دمك خفيف...و ده الشئ الوحيد اللي ممكن في وجوده نتسامح مع أي شئ....فيلم ردئ دمه خفيف...مغني ردئ دمه خفيف.....إنسان سافل دمه خفيف...أي جيف يو ماي فويس..." نجيب " ياريت تكلمنا تاني...ألو
_ ألو...
=هاللو..مين معايا
_ أنا وليد ..
=إزيك يا وليد..إيه رأيك في نجيب محفوظ يا وليد؟
_ راجل فنان...
=أكيد..طيب إيه رأيك في آنّا كارنينا ؟
_صوتها كان حلو يا عم جيجولو...مكنش وحش
=إنت ممكن تحب واحدة زي آنّا كارنينا ؟
_لو مش متجوزة و مش حامل...آه..ههههههههههههههههههههههههههههههههههه
=كنت بتعمل إيه من خمس دقايق يا وليد ؟
_ مفيش..كنت بتفرج على التلفزيون و بسمعك
=تحب تقول أي حاجة تانية يا وليد ؟
_أها...صوتك كان حلو يا آنّا
=بشكرك نيابة عن آنّا كارنينا ..ناخد إتصال تاني.. أهلا أهلا....مين معايا
_ مش حقول إسمي ..بس عايز أقولك إنك مين إدالك الحق بـكُـ* أمك تعمل فيها فيلسوف...
=أنا مش فيلسوف.... أنا جيجولو....ثم إن في الأفلام كلها المواعظ بيقولها بنات الليل..ههههههههههههههههههههه
..الدنيا دي زي السيجارة.....أحسن من الشرف مفيش .. هههههههههههههههههههههه....إلى آخره....قوللي يا "آرثر رامبوو "...إيه رأيك في صوت سارة ؟
_ وإنت مال أهلك ؟....إنت إنسان تافه و برنامجك تافه و اللي بيكلموك عشان يسمعوك تافهين و...
=طيب ما إنتي كلمتني يا "آرثر " ....
_ انا بس إتصلت عشان أتف عليك و أقفل
=و مين قالك إن أي حد بيتصل بيا بيحترمني...هههههههههههههههههههههههههههههههههههـ....كونسيدر إت هير..التفافة وصلت يا "آرثر "....المهم....إيه رأيك في صوت آنّا كارنينا ؟
_ أنا قرفان أصلا إن حد زيك بيعمل برنامج و ليه جمهور...و أكيد بتاخد مرتب على شوية الرغي اللي بتعملهم كل يوم دول...مع إن فيه ناس فقرا و عندها سرطان و ناس معندهاش بيوت من أصله عشان تشتري راديو و تسمع واحد *** زيك
=أوكي "آرثر"...فيه ناس فقرا....بس ربنا هو اللي وزّع علينا كل حاجة...إنت شايف إن ده مكنش صح ؟
_ده سوء توزيع من البشر مش أكتر...بفلوس برنامجك ده تأكل كام أسرة..؟
=كتير يا "آرثر "....بس أنا مش مهتم بالموضوع ه صراحة...نوت إنتريستد...إنت بتتصل بيا دلوقتي أند جيف مي مور ماني تو وايست إن ماي أوون بليجر...إنت بتدعمني يا "آرثر"...
_ إنت إنسان مقرف
=أنا جيجولو..أحييك "آرثر"...كلنا لينا مشاعرنا ....مستني إتصالاتكم...ألو ؟
_ ألو...
=صوتِك جميل ...مين معايا ؟
_ أنا علا....
=أهلا بيكي يا علا....إيه رأيك في صوت سارة يا علا ؟
_ مممممممم...معقول...بس هي إزاي تكذب على أسامة منير....ده شئ مقرف...
=إنتي متابعة أسامة منير يا علا
_ أيوه و دلوقتي مصدومة عشان كنت بتعاطف جدا مع الناس اللي بيحكوا مشاكلهم
=ده حقها...
_ لأ مش حقها...دي أولا بتكذب و ثانيا بتضيع وقت حد تاني يستحقه
=إنتي شايفة إنك تستحقي الوقت اللي بتتكلمي فيه دلوقتي يا علا ؟
_شوف..أنا عايزة أقولك حاجة......أنا مستغربة بصراحة إن برنامج زي بتاعك ده مفيهوش أي حاجة خالص غير كلام يفضل مستمر لمدة سنتين ...أنا كل اللي أعرفهم بيسمعوك...و كتير بلاقي الناس بتتكلم عنك في الكلية او في السي تي إيه ...
=جميل جميل....إنتي عمرك قابلتي جيجولو قبل كده ؟
_ هههههههههههههههههههههههه...لأ طبعا ...إيه اللي بتقوله ده !
=دي مهنة مهمة يا علا ....
_ بص ...إنت ساعات بتقول كلام غريب...إنت ليه مش بتقول حاجة مفيدة في برنامجك ده ..أي ثينك إنك لازم تفيد جمهورك ؟
=و بعدين ؟
_ مفيش...حتبقى عملت شئ جميل
=و بعدين ؟
_ حتستمتع بكده...إنك عملت حاجة حلوة
=طيب و سارة...تغني فين ؟
_ هههههههههههههههههه....متغنيش
=طيب يا علا...أنا مرة في الجرنان لقيت مكتوب مانشيت بيقول " نحن نرقص.."...فضلت طول اليوم مبسوط عمال أدندن وأرقص و أفتكر الجملة "نحن نرقص.." حتى بعد ما عرفت إنه كان غلط مطبعي ...كانت "نحن نرفض.."
_ أها...so ?
=سو غني لنا دلوقتي " يو أر سو جود تو بي تروو "
_ لااا...أنا مبعرفش أغنّي...أنا بس عايزة أقول لأدهم ....فورجيف مي
=أدهم...دونت فورجيف هير يا أدهم...يا جماعة أنا فعلا خلاص قربت أقتنع إني أسامة منير ..هههههههههه...ناخد إتصال تاني...ألو مين معايا
_أنا سالي
=هاي سالي....إزيك ...
_ أنا كلمتك قبل كده كتير...فاكرني ؟
=سالي أنا شايف إنك لازم تاخدي بالك كويس من اللي بتقوليه....هههههههههههههههههههههـ...انا جيجولو !...
_ لااااااااا هههههههههههههههههههههههههههههـ ....مش قصدي كده طبعا...أنا سالي اللي كلمتك يوم الخميس اللي فات
=الخميس اللي فات جيجولو مكنش هنا ....هههههههههههههههههههههههههههههههههه....على كل حال...إيه رأيك أدهم يسامح علا ولا لأ
_ أنا معرفش علا عملت إيه ...بس أكيد يسامحها...على فكرة ..أنا زعلت منك إنك قلت لسارة إنها آنّا كارنينا...و إن جوزها ممل
=أوووه....سالي....الدقة هي فعلا الشئ اللي ينقص الكون...أنا سميتها آنّا....مقلتش إنها آنّا...آنّا ماتت من زمان ..ههههههههههههههههههههـ....إنتي بتروحي سيلانترو يا سالي ؟
_ أها...بروح
=أنا يا سالي كنت بروح هناك كتير...
_ طيب بتقعد في أنهي سيلانترو عشان أشوفك ..ههههههههههههههههههههههههههه
=كنت بروح هناك مع حبيبتي...كنت بدرس في كلية طب.....طلعت ديوان شعر...إشتغلت دكتور لمدة سنتين..بعدين قررت أعمل البرنامج ....بقالي سنتين بعمل ده ...
_ واو !
=تحبي أي أوراق تاني يا سالي...ههههههههههههههههههههههههههههههـ...ببساطة أي حد ممكن يعرف مكان الإذاعة و يعرف إسمي بالكامل...ههههههههههههههههههههههههههههههههههههههههههههه....أسك أباوت جيجولو..إنتي تحبي تقولي إيه يا سالي...؟
_ أنا بحب واحد وهو مش بيحبني...
=اعترف يا سالي إني في حياتي مشفتش حد بيحب حد مبيحبوش و بعدين حصل و حبّه....أعتقد بس ده حصل في كذا فيلم أجنبي بحبهم جدا...ههههههههههههههههههههههههههههههه....ماي بيست فريند ويدنج...وفيلم لساندرا بولوك..أنا بحب ساندرا بولوك جدا...لو حد فيكم يعرفها ياريت يقولها جيجولو بيحبك جدا...سالي...مفيش حاجة إسمها حب...روح أسامة منير تحلق بكثافة في المكان النهاردة...ههههههههههههههههههههههه... مش حيحبك يا سالي....فايند أنذر ثينج تو ثينك أباوت...
ذاتس إت...
ثانك يو أوول...
آنّا..نجيب.وليد..آرثر..علا..سالي...
إحنا أسعد ناس على الأرض الليلة..
أسيبكم مع أغنية ستيفي واندر..
overjoyed ... المُمـ...تِـ....عة



12 comments:

ٍSOU said...

دة لو برنامج بجد على الراديو كنت هارمية م الشباك.. بس ..اممممم هو فعلا فى برامج بالسخافو و التفاهه دى علىالتلفزيون ...اممممم يعنى برنامج زى الىل انت عملتة دة مش هايكون فلتة دة هيكون اضافة جديدة لشلة البرامج السخيفة.. بوست يحرق الدم :))
مش قصدى حضرتك اكيد .. انا قصدى جيجولو

Sotouhi said...

هقولك كلمة واحد صاحبى بيقولها...با معدددددددى. من بعد هز كتاف و أنا مستنى حاجة تعجبنى كده...إنت معدى. منين كل السخافة اللى فى البنى آدم ده. سارة مش بتعرف تغنى و علا بتستهبل...جامد جداً

Anonymous said...

أنا سيباك مع جماعة نون من شي سنة و كنت عاقل يا محمود !
شو عمله فيك هناك ؟ بعرفهم مفترين بس مو لهاي الدرجة يعني
لا حول و لا قوة إلا بالله
ربنا يشفي
سوزان /س

Anonymous said...

مازلت غبيه !!


محمود .. نفسي اعرف دماغك بتشتغل ازاي ... ونفسي اشوفك



ماتحط صورتك في مكان ما

Layla said...

تعرف ان برنامج جيجلو ده مسلي جدا...بيتذاع امتى هه!؟
:D

عمرو عزت said...

GIGOLO

:D

ولــــــــــو said...

عجبني جداانه بياخد من مكالمة ويديها لمكالمة تانيه
عمل تتابع حلو اوي وبصراحة اتسليت
انا ممكن استمع للتفاهات دي فقط علشان سرعة البديهه بتاعه الاستاذ ده
فعلا جيجولو

انت فنان حقيقي
تحياتي

أحمد جمال said...

جامدة جداً ..

انت فنان بجد

تسلم دماغك

محمود محمد حسن said...

لا جامدة بجد

:)

Alaa Eddeen Shams Al-Qaisi said...

ربنا يستر يا محمود .. اخشى ان تدور الايام .. وأراك يوما جيجولو (المذيع مش الشغلانة) هههههههههه

جامدة جدا .. على الرغم من سخف شخصايتها الكاريكيتوري (أرجو ان اكون قد كتبتها صح) إلا انها واقعية جدا بشكل صادم .. هههههه

امراة من زمن اخر..! said...

سردك كان شيق جدا يا محمود .. واسمحلي اندهك باسمك علي الرغم من حداثة عهدي بمدونتك..

شخص مثلك يملك الاكثر ..

جيجولو انسان مقرف بس عنده هدف .. خفي .. واستطاع ان يحتوي الناس دون ان ياثر ذلك علي طريقة تعامله لاخر البرنامج رغم الاهانات .. بس بتعجب هو ليه حابب يجيب الشتايم لنفسه ههههههههه

ممتعه واكثر

متابعة

MaMaDo said...

مبن قال ان ده برنامج تافه, حلو البوست ده